A ue che so giòmpidu no nd'isco.
Ma isco su caminu ch'iapo fattu.
E no hapo bisonzu 'e mi 'oltare
pro ammentare... E pro sighire a tinu.
Inchieta e selena m'est sorre sa duda.
Ne mi pessighin impudos tardìos.
Galu abbàido e punno addainanti...
E mi torran diadas de pensu attrividu
e sididas anderas noales... In s'abba
de s'ismèntigu mudu
sas laras infunder non chelzo...
In runzones mi ballan ereos de 'antu!
A frionzos de paga cabuda, chena cras
e ne deris, timanzas e nìnnidos bambos lis lasso.
E mi dan fele e làstima e dolore
sos inzomos luados de sos carimannos
auppados in trona che fattuzos...
Imperistantu a ìrridu tottue
trimizones de sambene si pesan
fintza s'ultima ispera a nd'istudare.
E non bolat sa rundina annuntziadora
pro sos chi su pane cumassan a su 'enidore...
Chena pasu preguntas punghinosas
si paran a sos passos... E m'isettan
in giannas de su tempus chena tempus
ateras sempre caras cuntierras.
S'incumandu chi thap'a mandare lu cumpro
in sa 'ucca innotzente 'e su versu;
e che lizos de prata che lu 'etto
in su riu andantanu...Pro sempre...
A cabore,
chi non siat ancora comintzadu
su 'iazu ch'in s'anima che giutto?!...
Non isco mancu custu.
Ma so seguru chi no est finidu...
Giovanni Fiori (Ittiri)
2° premio 2005
(Sezione poesia inedita sarda «Antonio Sanna»)