Cun suave melodia
cantadores intonade
custa cantu 'e amistade
brotad'in s'anima mia.
Cantade cun boghe amena
custa cantone de paghe
ch'in sa terra 'e su nuraghe
bolet diliga e serena,
e che dulche cantilena
carignet montes e rundas
e sas lùghidas ispundas
ancor'innidas e giaras;
cantade cantones caras
cun suave melodia.
Faghide sa serenada
de amore a sos isteddos
ch' 'estin sos chelos nieddos
de custa notte fadada;
a sa natur'ammagada
prinza de mudes'arcana;
a sa luna risulana
ch'est ispuntende guvarda,
una serenada sarda
cantadores intonade.
Sa melodia 'e su cantu
abblandet dogni pelea
de s'umanidade intrea
rutta in dolor'e piantu,
e su sonu aterettantu
de s'armonica chiterra
cuet s'ispramm'e sa gherra,
de s'odiu s'amargura,
s'agru giambet in dultzura
cuastu canta 'e amistade.
Cantad'in limba dechida
sa bellesa 'e sa Sardigna
chi sa natura benigna
de incantu l'hat bestìda
e che fiza preferida
l'hat dad'istrina distinta:
de mar'e sole l'hat chinta
sutta chelos de amore;
cantade custufiore
brotad'in s'anima mia.
Angelo Porcheddu (Banari)
3° premio 2004
(Sezione tra poesia e canto «Pietro Pisurzi»)