Intratu in abba sole, issortu
ispantu.
Ispartinata ostia, fidele
in colore de arantzu.
Morit in sos ocros.
Ghettannesi a pesu mortu, corcannesi in d-un'isterrita
manna pren' 'e abba chin colores
pintatos, isfrenatos, chi no istan
mancu in chelu.
Ma so' ieo, sole-arantzu, grussu-ruju
a punt' 'e si tzoccare, a punt' 'e imbrastiare
serenu
s'orizonte.
Cussumanne, lassanne
ruja
un'ispera
'e mene;
brujanne
in su campu che frore. Solu
m'appompiat
su sole.
Commo in su mare s'est cupanne
ruja un'ostia chi m'ammentat
alluttos versos prenos
'e disizzos buitos:
"E no mi bastabani l'occi
pa fammi prubistha
di chiddu curori..."
Aldu 'os ocros
no bastan manc'a mie e fortzis
mancu custas duas limbas, bastan
a nos torrare
su sole meu tuo
chi sa entre est caentanne
che fizu a su mare, prenannesi
de abba pro ischitare
dies a manzanu, a sero
nughes
iffustas de calore, graidas
de promissos colores.
Giambernardo Piroddi (Sassari)
3° premio 2004
(Sezione poesia inedita sarda «Antonio Sanna»)