Cherimos un arbor'e pache
e un arbor'e sole caente;
no l' imbias un arbor'e luna?
Naran jocande sos chimbe orfaneddos
chin candida boche de nibe,
sos chimbe orfaneddos jocande.
Cherimos un arbor'e luche
beranile, bestì'e lentore,
chin chentu puzones nidande.
Naran jocande sos chimbe orfaneddos
chin candida boche de nibe,
sos chimbe orfaneddos jocande.
O puru una macchin'e sole
chi fraichet mizas d'isteddos
pro los dare a sa notte nighedda
cand'aperin sa janna sos tronos.
Naran jocande sos chimbe orfaneddos
chin candida boche de nibe,
sos chimbe orfaneddos jocande.
Dego cherjo sa pach'e su pane;
dego cherjo s'amor'e su bentu;
dego cherjo una tanca frorìa;
dego chentu chitarras sonande;
dego cherjo una làmpana d'oro.
Naran jocande sos chimbe orfaneddos
chin candida boche de nibe,
sos chimbe orfaneddos jocande.
Pietro Mura
1° premio 1960 (Nuorese)