Dormi lizu 'e mare
profumad 'assussena
mama cun boghe lena
como t'ad'a ninare
dormid'a s'anninnia
fizu meu, Miale,
mai ti tocchet male
cor'e anima mia
serra sas lughes giaras
assonnadi cun Deu
ti miro fizu meu
iscanzende sas laras
dormidi chi ancora
su entu movet frunzas
unu cuncord'e brunzas
s'intendet dae fora
de canta galania
Deusu t'hat dodadu!
che trigu seberadu
hasa sa losania
dormidi, lea sonnu
oh fizu beneittu
aligos e prammittu
crasa ti attit nonnu
mariposas in bolu
s'anghelu t'est pintende
in su chelu gioghende
bolana pro te solu
dormi meu tesoro
e in sas nottes bellas
ti etten sas istellas
tottu s'incant'insoro
est notte de lumera
e addae sa luna:
-appas bona fortuna!
t'iscriet in s'aera
s'istudat sa fiara
su fogu est tudadu
paret tott'incantadu
in custa notte giara
como sa santigada
ti fatto fizu meu
e t'incumand'a Deu
ch'est ora feriada
dormi, dormid'in pasu
ch'est mam'acculz'a tie
e cand'ispijat die
t'ad'a dar'unu asu
dormi, dormid'in pasu.
Graziella Porcheddu Uselli (Sassari)
3° premio 2003 (Sezione tra poesia e canto «Pietro Pisurzi»)