Li notti ridìani
di bucchji di mandarini
i lu brasgieri, notti chena seri
di lugi agguttadda
in un buleu, notti a cancalleu
tra affetti inghiriaddi ad una coppa
e la corti stintinnadda
a lu bugghjori, chisura da invintà
a chi ddà di li pultetti.
Lu bugghju allarga l'orizzonti
a li piccinni, sbrocca la fantasìa,
i lu veddru baddinosu
eu vidìa la mea e la to' cara
scunnisciudda dumani, cu' lu sonniu
chi lèbiu sguttigghjava
li bibiristi e s'acchjarava
a la maìa. Mai l'agghju
incuntradda chissa cara, né
un'altra accarizzadda
cu' la premmusìa di candu
li notti ridìani
i li bucchji di li mandarini.
Giuseppe Tirotto (Castelsardo)
1° premio 2005
(Sezione poesia inedita sarda «Antonio Sanna»)