SUNT TORRADAS


Sunt torradas a mente tott'in d-una
sas cantoneddas chi babbu cantaiat
prO mi giogare
cando fio pisedda.

A Santu 'Asile 'e monte
fit naschidu
e faeddaiat su campidanesu:

Dami sa manu e unu bellu gioghittu
faghimus como, cun sos didixeddos

Intro sa manu sua
manna e callosa
cun dilighesa bi poniat sa mia
e a unu a unu
dae su pius minore

leaiat sos poddigheddos
cantende
sa filastrocca chi faghiat goi:

Pintirinchinu (fit su minoreddu)
mesu fainu (fit su 'e s'aneddu)
fainu longu (su pius longhitteddu)
lingi pingiadas (cussu indittadore)
e mocci piogu (su mannu
ischitzadore)

Che porcu-surdu
custa tiritera
iscultaio che una sinfonia.

Torra!...Torra!...
E babbu
pascesciosu
ripitiat:
Pintirinchinu...
E infattu
cussa de su babbarrotti:

Babbarrotti
babbarrotti
su chi andadat de notti
su chi andadat de die
prO pappare...Atie!...A tie!...

Custa
finiat cun su corigori
e un'abbratzu mannu 'e cuntentesa.

Antigu incantu amenu
cuddu giogu
trama de ammentos
ligada istrinta l'apo
in s'atta de su coro
chi
amorosu
custoit
sas deliscias pius raras de una ia.