STUGGIAI UNA MEMORIA


Unu merì trigadiu cumprit sa dì
in umbras moddis
serrai sa benda
de is celus una gana de bisus

a lacanas firmas su mundu morrit de bellesa
in sa notti aundi is formas s'ammesturant.
Gana chi inarcat su tempus a sentidus.
Fini fini
sa luxi s'interrat

nd'abarrat feti un'accordonada de fragus.
Custa est s'ora benigna.
In su mudai de porpora
o
eternamenti
di oru
lassu andai su coru
e crescint is pensamentus:
in su scuriu tippiu
si fait prus craru su mundu.
Mi parit de conosci unu pesai fittianu
de pispisus chi non faint rumoriu

unu billai de boxis a stesiu arresant brebus:
is ominis e is cosas allevant dudas noas
po non fai incresci sa vida. Si unfrat a illadu
unu zaulai de canis perdius intr' 'e sa notti;
arrolia arrolia zerriant sa nea
po chi torrit profilu a donnia forma.
S'abbrubuddant is sonnus de suncuna
che unu bentu stibau de follas mudas.
Spollincada e funduda m'affracat
una notti de pantasimas. Torrat intera
una gana stuggiada de memorias
e is celus si ndi pesant de terra.
S'umbra lebia torrat a fai
totu interu su mundu in d'unu verbu.