Sparzimentu de is benis.

Chieta dormiat sa notti
in is ogus nozentis de su pipiu.

Stringendusiddu a su suidu
sa mamma ddi tessiat i' sonnius
cun su filu dorau de is contus.

Chieta dormiat sa notti
in is ogus nozentis de su pipiu.

De tantis in tantis sa mamma
accarizziàt sa carixedda sua
e dillicadamenti
anima e corpus ddu basàt
comenti a ddu scabuliri
de sa zerriada de su soli.

Is passus
chi po totu sa notti
dd'hiant appettigada su coru

immoi lompìant a issa
cun arrutroxa infinida:
fiant is passus de su dolori.

Sa porta s'est scarangiada;
unu cinnu curzu de saludu
e duas manus forzonudas
hant affangottau su pipiu
chi chene sciri in su sonnu
sighiat a fai bella sa cara sua.

S'omini aici ndi dd'hat pigau
stracciau a unu amori mannu.

Efisio Collu
via Aldo Moro 2
09016 Igiesias
tel. 0781 43096