SOLIDAI...

Froga 'e anima

furada a pessamentos
de isporu

bena antica 'e ribos de mirallu
in istios de ruja solidade


cantamila
a sa muda

chin su pìliu 'e sas fozas naschinde

sa cantone 'e sas dies

carinnami sos pessos
chin s'alenu cubau
'e su coro tuo agreste
chi

a cada mòghia "e chizos

ischinziddat

che calabrina ferrada a nobu
currende su pannu 'e sa pache

in s'impredau ruju 'e su sentìu.

Frina 'e anima

furada a bolos nudos de astores

in agheras d'iscunnortu

intro sas dies meas
andattanas
a istripittu 'e alas t'intendo.

Mariposa 'e pessos benidores
rucramilas sas benas
non mi bies?:

So' solu
irbinarjau
che frore sumurtìu

in custu desertu 'e ocros impurjaos

isettande s'afficcu 'e unu versu
de amore carrale...
(in custu mundu ribale).

So' alluttu 'e sìdiu...

Istùttami custu focu
in su ribu cubau
chi ti curret fadau
sutta sa pedde ìnnida 'e lentore
de su corpus tuo
'e frina...
Poesia...