FAEDDU 'E VIDA PRO S'AMMIRU

Soberanos
tribuladores burdellos
e fintzas carchi clacson a lamentu
in su fitianu travigu 'e su sero
sinnan custos tempos de movimentu

Parimus a su velotze cundennados
che a s'appretu e a su cussumire
e curren e fuen fintzas sos pessos
ei
lieros
ma malos a ponner a pare.

No est chi non nde podimus bessire
chi sa linna pintada nos incantat

est chi piaghet a b'esser e b'arriscare
proare sa balentia a volante in manu.

Gai 'olto sa cara e chirco su connotu
fiagos leo de copuletas e casadinas
e s'oju andat in ventanas e sutteas
antogorios impedrados e iscalinadas

e mi! luego

mi nd'enit si l'ap'a poder frimmare
ite e comente fagher a la tentare
in s'ora chi s'istentat in sas bidrinas
a isfaju dulche e chena isfadu

issa
femina briosa 'e trufos
lebia che mariposa in s'aera
armonia de frommas in andera
faeddu 'e vida pro s'ammiru.