Risposta a Marianu

A totu sos iscrittos chi retzidu
hapo sa di-e sa festa 'e sas Frinas
oe sa moda tua si est aggiunta.
E deo prus che mai inorgoglidu

de cust' arzola 'e umiles geninas
a tie puru nd'oferzo una giunta.

De Macumere in sa pru arta punta
so dimoradu che chi sia mere
de cantu in s'universu c'hat criadu
e curro cun su entu a vel'isparta:
de Macumere in sa punta prus arta
so dimoradu che chi sia mere

in sa punta prus arta e Macumere
so che chi sia mere dimoradu
de cantu in s'universu c'hat criadu
e curro a veli isparta cun su entu
d'agattare sas musas in s'intentu
e poesia vera a pizu ogare.
in s'intentu sas musas d'agatare
e poesia vera ogare a pizu:
ma est chimera su meu disizu
ca in ateru logu issas abitan.

Solu lebias Frinas mi visitan
cando enin d'eranu dies tebias
e amparu in sos versos chirco tando
pro poder haer calc'ora 'e consolu:
lebias frinas mi visitan solu
cando enin d'eranu dies tebias.
mi visitana solu frinas lebias
tebias dies d'eranu enin cando
e amparu in sos versos chirco tando
pro poder de consolu haer calc'ora :
e nd'est bessidu su librittu a fora
chi s'amigu Pillonca
l'hat iscrittu

e nd'est bessidu a f'ora su librittu
chi l'hat iscrittu s'amigu Pillonca.
Ca
a mie mai m'est bennidu a conca
in cussu campu a fagher iscumissas.
Ma est chimera su meu disizu
ca in atteru logzu abitan issas.
Sas rimas tuas de antos prolissas
sun che de maju lentoradas fruas
ch'estin su logu e festa e de ammaju
e mi atin a ojos sas lagrimas:
sas prolissas de antos tuas rimas
sun che de maju lentoradas fruas.
sas prolissas de antos rimas tuas
lentoradas sun fruas de maju
ch'estin su logu 'e festa e de ammaju
e sas lagrimas a ojos mi atin
e de su coro a s'intimu ch'imbatin
ca dogni versu est una prenda 'e oro
e imbatin a s'intimu 'e su coro
ca dogni versu est de oro una prenda.
mancari poi a sa fine cumprenda
chi cantu naras est pro brulla e giogu.
Ma est chimera su meu disizu
c'abitan issas in ateru logu.
Però mi dan cuntentu e disaogu
e poete mi parzo in su momentu
ch'in sos tuos eloggios mi carrarzo
e tando a oju abertu isande so:
cuntentu e disaogu dan però
e poete mi parzo in su momentu.
perù mi dan disaogu e cuntentu
ch'in su momentu poete mi parzo:
s'in sos tuos eloggios mi carrarzo
tando mi so isade a oju abertu
ma da chi mind'ischido
su desertu
de sa mia ignoranzia torra ido:
ma su desertu
da-chi mind'ischido
de sa mia ignoranzia ido torra.
Intantu est doverosu chi t'aporra
grazias milli pro su bellu cantu.
est dovrosu chi t'aporra intantu
grazias milli pro su cantu bellu:
su c'has a mie inbiadu modellu
onor'e fama hat a batire a tie
su modellu c'has imbiadu a mie
hat a batire a tie onor'e fama.
e-i sa tua sonniada brama
cantu prima has a bider apagada.
e-i sa tua brama sonniada
apagada has bider cantu prima.
e cando has esser de Parnasu in chima
Melpomene e Talia ti dan basu
e cando has esser in chima 'e Parnasu
ti dan basu Talia e Melpomene
Adiu amigu caru
istadi bene.

Salvatore Murgia
Via L. da Vinci
12
Macomer
Tel. 0785 71557