GOSOS DE SANTA RITA DA CASCIA


1) Tue che rosa ses pigada
A su chelu beneitta
Sos istragos nostros Rita
Sana cando ses giamada.

2) Ses sa prenda 'e su Segnore
Ch'hat bidu sa lughe in Cascia
Babbu e mama pro sa grascia
Than servidu cun amore
Ca retzidu han su fiore
In edade già avvantzada.
Sos istragos nostros Rita
Sana cando ses giamada.

3) Send'in bantzigu de oro
Unu olu de abes giaras
Postu t'han su mele in laras
Ca s'auguriu fit s'insoro
De ti crescher che tesoro
Ca fis santa prenettada.
Sos istragos nostros Rita
Sana cando ses giamada.

4) Pro su Deus Soberanu
Fit su pensamentu tou

Ma ti des'in cogiu nou
Unu coro disumanu
Chi t'hat dadu fittianu
Una vida tribulada.
Sos istragos nostros Rita
Sana cando ses giamada.

5) A sa muda hasa suffridu
Resinnada dogni offesa
Bagiulende cun sabiésa
Sa pelea 'e su maridu
Chi pro manu hat retzidu
Una morte cumandada.
Sos istragos nostros Rita
Sana cando ses giamada.

6) Fizos tuos vendicare
Si cherian de repente
Su Segnore Onnipotente

Ca cherisi a non peccare

T'accanseit de lo' leare
Cun s'allutta 'e una lampada.
Sos istragos nostros Rita
Sana cando ses giamada.

7) Sende sola t'est sighida
D'esser monza Agostìniàna
Ma frimmadu t'han sa gana
Ca battia fisi affriggida
E no virzine dechìda
Che Maria immaculada.
Sos istragos nostros Rita
Sana cando ses giamada.

8) Ma Santu Giuanne e Santu
Nigola e Sant'Austinu
Ti ghies'in su caminu
Pro ch'esserasa s'ispantu
E bintrada sese a bantu
In cunventu incoronada.
Sos istragos nostros Rita
Sana cando ses giamada.

9) Sende monza beneitta
A sos poveros daias
Sa proenda costoias
Pro sa zente tua afflitta
Chi prk ispantu in sa fallitta
Tottu in rosas s'est bortada.
Sos istragos nostros Rita
Sana cando ses giamada.

10) Cristos santu protettore
Dae sa corona divina
Ti ponzesid'un'ispina
In sa fronte pro dolore
Tenta l'hasa cun amore
Bindigh'annos incarnada.
Sos istragos nostros Rita
Sana cando ses giamada.

11) Pregaisi notte e die
Send'in lettu sufferente

Una rosa una parente
Regogliésit pro a Tie
Isbrottada in mesu 'e nie
Pro meraculu ingendrada.
Sos istragos nostros Rita
Sana cando ses giamada.

12) Sende morta
in su cunventu
Postu b'han sas raighinas
Cuddas rosas tuas reinas
Chi fiòrin pro s'appentu
De lassare durche ammentu
In s'aera profumada.
Sos istragos nostros Rita
Sana cando ses giamada.

13) Già chi t'hamus avocada
Aggiua sa zente afflitta
Sos istragos nostros Rita
Sana cando ses giamada.

Vera Farris
Reg-Tuvu 'e Riu - Mores (SS)