Su pastore cun ojos de 'iddìa
t'abbàidat piena de lugore
tunda che un'aranzu in mesu chelu
Non s'intendet il logu una sisìa,
sas fozas sunu frimmas, su trainu
brinchittat, lentu lentu:
est'unu muttu
antigu e sempre nou .. .
Bàulat unu cane da-e su chelu,
unu puddedru annìjat in s'iscuru,
cantat s'istria surda e arrughida
a colpos siccos che un'agonia
t'appende sas intragnas de sa terra.
Su lentore ad'iffustu su trovozu
e cun sa conca subra 'e umi crastu
s'imbrancònat pensosu su pastore
abbaidende a tie
tunda che un'aranzu in mesu chelu.
Amiga e sorre cara tue sese,
amiga e sorre cara e testimonza
de sonnos chena nìnnidos,
de nottes
a pan'e abba passadas,
de penas
a nod'in bula ingullidas,
de 'ozas
mortas primu 'e nàschere
intro unu coro mannu
sutterràdu in su tempus
coment'e unu zigante in su nuraghe ...
Non fin custas sas nottes chi cheria,
cando sos ojos mios t'happo istadu,
cand'happo trippiàdu sos neuddos
cun su suore in càvanos
in fainas anzenas,
cando s'alzala piena 'e sede
daìat trigu a somas
e-i su sole
allumaiat s'adde.
Però non mi nde impùdo
de su-ghi m'hasa dadu,
ne ti chelzo indebbàdas frastimare,
ne piànghere chelzo ...
Ma pius non m'imbrancòno
ispettende chi tue ti che fales
addaisègus de sos montes nudos
pro torrare s'incrasa
frisca che un aranzu in mesu chelu.
·Como isòlvo sos canes
da-e su presòlzu antigu;
sos puddedros chelzo istrobeìre
pro los ispramminare a curridòlza
intro sa tanca aberta e chena làccanasa
chi su chimentu issoro
fattat assucconare
sas ambesùas cun s'isprone in pe' ...
Ne muros e ne giagas

b'had'in sas tancas tuas
am1ga e sorre cara:
sos sardos
muros e giagas non chèrene piusu
pro sos babbos de oe,
pro so fizos de crasa.
A manu tenta
e cun ojos plenos
de dignidade antiga sempre azzesa,
t'ispettamus cantende
in dies pius mannas
in nottes pius bellas
bianca e risulana
piena de giaresa e de lugore
tunda che un'aranzu in mesu chelu.