A SA DIMORA DE S'OMINI

Dimoras in pettottu sprazzinadas
chi s'abereis sempir' e serrais
fendu cuntentu chini tenid crais
po liberas bessidas e brintàdas ,

mai po prepotentis intimadas
aberidura facili tengais !
de bàscia marranìa non siais
in perùnu momentu provocadas .

Costruìas in epocas passàdas
o in tempus recenti po serbai
fiducias in s'amori procuradas ,

sorti sola tengais de durai
comenti cuss'amori s'had sonadas
senza chi nudda s'appettighid mai !.


Farfallas , ch'in beranu prodigiosu
teneis de is alas movimentu ,
senz'e fini , cun bolidu festosu
fendind'a sa Natura cumplimentu

de unu giru de completu gosu
fervidas biveindi su momentu
e no tengais si puru è pressosu
bideas tristas e rincrescimentu .

Meda , farfallas mellus in edadi
chi no s'arribbad a cumprendir prantu
est un istanti de felicidadi

che longus annus bivius in ispantu ,
penzosus de s'estrema Beridàdi
chi su bolidu privad de incantu !!....


CANTAD'UNU 'ZZUARPU

Oh sorradas fontanas
a s'arrisu de fora
In Sa donu severa....!
cun promissas galanas
tra collinas e coras
torrad sa Primavera

S'arrundini festosa
de continenti strangiu
per i s'aris nodias
torràd'est amorosa,
cantend'a su cumpangiu
"lollas nius o crias".

Sa donòsa natura
rendid incantadoris
mericceddus e chizzis
si spandint in s'altura
cun noeddus vigoris
murdegus e noddizzis.

E bosatras in asi
sonnendu de gosai
gioias isparias...?
podid'essi po crasi
oppuru po prus mai,
tristas fontanas mias.

Ma, vanu est a si doli,
pordendu in d'unu 'isu
penzamentus
bellu é puru su soli
ch'in beranu s'arrisu
basad de fillus mius

Issus po mei bianta
bollidus de pillonis
gentis in libertadi,
abrillis chi arrianta
in bellas otagionis
de paxi e de buntadi