In casa dui spicci, manni, manni,
aggiu in dui stanzi diffarenti.
Unu impieddosu li passaddi
anni mi mustra,
freddu, indiffarenti.
L'altr'invecci sorrisi
e cumplimenti,
mi faggi cand'in eddu
mi riflettu.
Asciuttu palgu e nettu,
cument'unu spagnolu
mattador'i l'arena.
Ma si pal casu appena,
entru ill'altra stanza ...
(poaru me!) La panza
m'appari che tamburu!
In chiss'istanti giuru,
lu spicciu dispettosu
tutt'a pezzi faria;
si una boggi macca no digia:
- Calmaddi beddu meu!
E si no se' mancanti di cialbeddu,
Rasciona un poggareddu!
pesa la viriddai!
È tutta illusioni
e tu lu sai,
chi no è celtu culpa di l'ispicciu ...
Nudda ni bogga,
nudda n'aumenta
chist' oggett'usuali,
si tu lu fai a pezzi
a cosa vali?
sempr'inrisoltu resta lu problema!
Téniddi contu, inveci,
e aggi cura
di la present'eddai,
lu passadd'è passadd'oramai,
e inutili fanni maladdia!
No torra
più la pessa piccinnia,
no torra la passadda giuintura,
chist'è la giusta leggi
di natura.