Cun sos cavanos rosa, irgonzosedda,
s'est presentada in sa buttega mia,
«So 'ennida... - mi narat - ca cheria
unu banzigu: isetto una pisedda.
Una pisedda bella ojos de mare,
chi la 'est'e la ninne che puppia:
coment'e tando, comente faghia
cun sas chi mi daian a giogare.
Una pisedda cun sos pilos d'oro,
chi, mamma-mamma, mi potat giamare;
chi custas tittas li dia a suzzare
mancari si che tiret custu coro.
Faghidemi unu banzigu chi solu
la ninnet, senza chertu lentu-lentu:
comente chi la banzighet su 'entu
o chi la gittan pabeddas in bolu.
Unu banzigu bellu, rivestidu
de seda fine, de brocadu e rasu,
chi dormat pupa mia e tenzat pasu
che una puzonitta 'intro su nidu.
L'hap'a cantare tando un'anninnia
senza pretesa però tott'amore:
chi tenzat cudd'ispezzia 'e sabore
de sas chi cantaiat mamma mia.
E tando ite mi nades? So andende.
Pro cando nades chi mi lu faghides?
Tenide contu cando lu tinghides,
ch'est pro sa pupa chi so isettende».
«Una pisedda? E comente e comente!
E non ses tue, pisedda minore?
Si has ancora in ojos su lugore
de tottu su chi est bellu e innozente?
Su banzigu ti fatto, e d'ogni cosa,
a tott'impignu 'atto a sos congruos,
li do sa tinta 'e sos cavanos tuos
de cando ses bintrada birgonzosa».
Com'est finidu «Afferralu, pizzinna,
pro me ses sempre gai, ancia in bonora.
Deus t'aggiuet e Nostra Signora:
cust'est sa vida; bae, canta e ninna».