Turtura, ite m'istas bolande
dae s'unu a s'atteru ramu
aggrucandemi benas de coro?
Lassami istare cantande,
cust'angustia m'agurtit sa bida.
Non bies chi pacu cuntentu
mi dat custa arbeschia fritta.
Un'astore chin ala mala
bolande bolande bolande
dae s'una a s'un'attera ala
de campanile est toccande
campanas de attittu e pena.
Da' innedda su tunchiu s'intendet
de sa corbanca nighedda.
In custas biddas desertas
de zovanos non b'at anca
b'at bezzos e bezzas e zente
prena d'anneos e d'annos
e pizzinnos innossentes
a muricu e chene isperanzia.
Currende in custas carreras,
prughere famene e morte
tres paragulas marranas
istiddian sa terra arbeschende.
Troppu frades b'at currende
in terras isperdissiadas,
sechentamiza manos
ghettadas che ape-beras
dande a attere ricchesa.

Turtura lassami in pache,
su coro l'intendo frittu
frittu prus frittu 'e su frittu:
s'astore a farrunca a farrunca
tottu mi l'at fattu a fitta.
Bae turtura in ora mala
. .
mancan, non naro pmna,
ma chi mai si biat prus ala
chi bentallet de tene bolande,
prus chi torrene a cantare
mancari a su dorolindò
sos amicos chi partios
fin chircande travallu e pena
ligadenos a una cadena
oi su travallu ti do.
Astore jai ti credia
astore de furabentu
e mortu m'as a culumba
morta l'as a traittorìa,
culumba chi fit de pache
de amore d'omies fortes.
Commo bi curren corbancas
in custos loccos de morte;
biddas desertas e tristas
chin bezzos e bezzas in pena,
sos pizzinnos pro s'isperanzia?
Turtura, lassami in pache
cantande, cantande sa pena.