EUTHÀNATOS

(Anch'andant tot'is mamas de is poetas)
Immoi dormei marnai, dormei serena,
totu sa stanza est prena di amori.
Est lompiu finzas s'urtimu bendidori de carapigna,
tot'is pastoris de is montis de Sardigna
dd'hant'intregau sa ni' de Gennargentu,
po assuermai su turmentu e su fogu
chi portais aintru e in dogna logu
anca totu si summat su dolori.
Hat a studai s'abbruxori e s'hat a donai friscuras,
dormeisi' marnai, luegus andaus a Uras,
torrais a bidda, ddoi est sa festa de Santa Maria.
S'aspettant prucessioni e cunfraria,
sonadoria de canna e de sonettus,
cantu a repentina i a mutettus,
canzonis di amori e di argiola ..
Heis a ballai cun totus, i a sa sola
imbriaga di arrisu e de festa.
Dormeisi' marnai, mancai nottesta,
sind'heis a sciumbullai a s'arrosu,
i hat'essi' riposu bellubellu.
Nd'hanti messau dogna gravellu,
dogna lillu, s'afabica affollittada,
e in eresia s'aspettant a cambarada
messaius, spigadrixis e carradoris.
Hant approntau s'arregorta de is loris
ind'unu carru mannu chen'e contu
e dogna cuaddu est prontu, cuncordau,
attaccau a sa filera longa de is carretas.
S'hant'a portai anc'andat tottis mamas de is poetas,
innias heis a gosai, i heis a torrai
a is intragnas de sa marnai bostra.
Custa di hoi, sa nostra, est sa pregadorìa
prus suffrìa, cussa prus dolorosa chi fadeus .
Dormeisi' marnai , dormeisidda po s'amor 'e Deus.
Heis a fai sonnu durci e chen'e dolu
liggera in bolu che pinna de varzìa,
no suffrais prus, dormei marnai mia ...
Seus totus anninniendi su barzolu,
Marnai stimada, coru dolorosu,
anninnia ... Dormei, bonu reposu ...