PARADISU PERDIDU

Che Venere bella
cust'isul'antiga
est naschida, narana
da-e s'und'e su mare .
In s'umbr'e sas murtas
sa femina fit
drommid'in su padru .
E Tue, Criador'e su mundu
a unu cumpanzu pensende
luego lu leaias
da -e s'ena 'e su coro 'e issa.
E umpare si ch'andaian
66
da-e subr'a sa vett'e sos montes
mirende s'infinidu
o in punt'e pes cattighende
s'ispum'e su mare,
s'aren'in colore 'e rosa.
E oe custa lughe,
morend'in su chelu che lampana
mi torrad'attire s'ammentu
e isto abboghinend'in su buscu
e isto pessighendelos.
Ma sun isparidos che umbras
in s'umbr'e unu sonniu.
Su fum'e sos truncos
'nde attid'attesu sas boghes,
in mes'a sos chercos e a sos laros
s'est perdida s'ecu 'e sos passos.