S'UNDA DE SU TEMPUS

...Una 'ia
si peseit s'unda
e leit a cabulare
in su mare de sa vida .
Cando crispa, cando pria.
E-i s'omine si tuccheit
daenanti a s'unda
cumbintu esseret mere
de su mundu intreu.
Ite, ch'apat tentu pore
chi coizende passu
si podiat agattare
cun sos pes in s'unda!
Ahi, ahi omine,
maistru 'e intzidios
e fraigadore de pontes,
no crobas un'imbentu
chi attravet s'unda
chi die pro die
a s'anda e torra
ti che trazat sa vida.
Una vida prestada,
chena unu istrumentu
chi nerzat: "Tale die
torrat a su mere".
E-i s'unda no perdet passu .
Cando crispa, cando pria.
A pagu a pagu, a pagu a pagu
lassat a posteros,
ebbia istigas.