SA PINNA MEA

Dia cherrer biere
sa pinna mea
ballare ...
Eja, ballare!
Sichinde sas intrinas
de ziros de maghias
in d'unu andalitorra
de sonnios èteros
dae sos pintaos surcos
in semidas nigheddas
ghettadas
in sa terra cana.
Dia cherrer biere
sa pinna mea
fabeddare ...
Chistionare
sichinde sos nodos
molios a intalliu
de s'anima mea
chene s'animare
pro sa timoria
de podere incrarire
sas cubadas birgonzas.
Dia cherrer biere
sa pinna mea
vivere,
pro cumprendere
cantu siet tostu
galu,
pro nois, chene meres
e isperas,
poetas d'unu cras
troppu pizzinnu
o troppu incanìu,
de l'accumpanzare
chene dubidas,
in sa caminera
de sa sorte
prezisa pro su mundu.
Dia cherrere ...
Meda,
pro nos cumprendere,
omericos istrumentos
de custa terra 'e dolu.