TAZOS A MUILU

Ap'intesu
in sa cussorza sicca
da-e sas fortes caldanas de s'istiu
su nuscu 'e sa paza brujada .
Ap'idu
sos tazos a cunillu
in sa terra atturrada ,
semenad'e ispìnnicos
muilenne affach'e su mortorzu.
Unu biju astringhendesi a sa marna
zinnu e vida, in mesu e s'assera
incanida e isparta in su padente.
Tazos a muilu,
limbazu de piantu, de dolore.
Ojos alluttos
razzigan in s'iscuru e sa notte
leenne, chin su entu,
su grumu 'e sos fiados
lantados, chi su cras no han siguru .
In sa cussorza
s'iden lumeras a s'allugh'e mori,
s'intennen boghes 'a badde zumpada,
s'aera est isteddada,
sa luna risulana est avanzenne.
E dea
gristu, mudu, osservo e intenno,
su respiru affannadu
de custu mundu anticu,
morinne d'anzi die senz'amparu...