E... FIAT POESIA

Nottesta
m'est apparessia in sonnu
una giovunedda,
fiat .bella... bella,
donosa che una fada,
portàt pilus de seda,
cara di arrosa,
lavras de coraddu
e ogus .... ogus
disigiosus de fastiggiai.
Sa manu sua calenti
hat istrintu sa mia,
m'hat passillau
in-d-unu mundu
fattu di arregordus,
peri cammineras de lillus
e rosas arrubias.
Asutta su celu
apparicciau de istellas,
a su schiringiu 'e sa luna,
stringendunù a su pettus
unfrau di amori
"istimarrù", m'hat nau,
"istimarrù cun totu su coru,
amori miu,
t'hap'essi' sempiri
cumpangia nodìda
in gosu e in tribulia".
Nottesta
hapu fastiggiau
cun cussa giovunedda,
m'indi hat furau
su coru e su sentidu,
fiat bella... bella,
donosa che una fada
e ... fiat Poesia.