In Primo Piano
S’oràculu
S’oràculu
De Atena su seru
e d’Atene
lampizos d’antigas saviesas
m’at dadu s’oràculu miu digitale
bocand’a craru arcanos
de deos e de mundos.
Missale de custos tempos novos
po dònnia dimanda at un’imposta
chi ponet sas alas
a bolos de paràulas e de pessos.
Mortas sas prendas betzas
chin sas noas m’apento
in imbriagheras chen’accabadorzu
d’utopias lugorosas
e promintas galanas
chi m’isturdint
e m’accumpanzant
in àndalas de acòru e soledade
faghèndemi irfainare
chintales de ispera
e temporadas mannas de sentidos…
Chin s’istimau siddadu ben’istrintu
pèrrico in impredados
ue solu unu cane istat in runda
travicande su mere
a nara-iscurta in su telefoneddu.
Tot’in d-unu m’abizo irraighinadu
chen’orgògliu
nen bisos
ne una limba
chi toccheddos de coro mi daiat.
Mesu umanu e mesu màcchina
galu non resesso a iserrenire
s’est sa carena mia unu roboto
chin su coro de òmine…
o si sa carre est carre
e s’anima
solu artefata ispipillesa…
| Titolo |
S’oràculu |
| Sezione | Poesia Sarda Inedita |
| Autore | Gonario Carta Brocca |
| Nome | |
| Anno | 2023 |
| Argomento | |
| Descrizione | |
| Lingua | |
| Editore | Premio Ozieri |
| Contributore | ATHENA SRL |
| Tipo | |
| Formato | |
| Fonte | Premio Ozieri |
| Relazione | Concorso Premio Ozieri 2023 |
| Copertura | Logudoro, Sardegna Italia |
| Diritti | Comune Ozieri, Premio Ozieri |
| Analisi del Testo |
