" Ben fa chi fa ...."


Bella e ardita fisi , Isola mia !
che fortezza forràda a intro e fòra .
Buscos chi non filtrìa sa colora
fìn sa tua ricchesa e garanzia .
Oe non prus : comente a una ia
su naturale mantu ti onora ,
ca sese in ogni sitO trasformada ,
che una testa lanosa rasada .

Oe contas piùs de un'istràda
de bacinos , bonificas fiera !!...
Ma non prus pro sa cazza ses altera
ca buscos pro sa fra no bin d'ada .
Dei cudd'antig'abitu ispozzada
nemmancu in sos affettos ses sincera .
Nè ospitale ses che una òrta
cà sese tantu avvelida guasi morta .

Dae cando su buscu an'atterradu ,
chi s'arva in dogni monte fattu b'hana
appena appena bùnda sa funtana
làgrima de lamentu isconsoladu :
sempre pensende a su tempu passadu ,
ai cuddos chercos garrigos de lana
cun bistrale e fusiles polentones
distrutt'han buscos distrutt'han puzzones .

Pro torrare a Sardigna sos onores
tancàdela sa jànna a sos angenos !!
In sa cazza , in sos taglios ponzan frenos
pro non distrue sos suos valores .
Torrene a progredire sos laores
abbas friscas e logos tantu amenos .
Torre s'antiga rana incancellabile :
non piùs custu voltu miserabile .


Eo ch'appo unu versu miserinu ,
non pode custa oghe essere intesa .
Sos ch'azzis bona pinna in taulinu
bandide su ch'a s'Isola est offesa ,
pro torrare a s'amore genuinu :
plus rispettu pius nobilesa .
Sardos unidos reclamade in coro
pro diffende s'antigu ostru decoro .


" Ben fa chi fa ..... "

In chìrca 'e aliméntu, poverinu ,
ch'éssidi , su manzànu a faccia a mare ;
cun d'una canna in manu unu cestinu
isperanzosu de poder piscare ....!

Pro dare a sa familia ite chenare :
cà non ha pane in càscia , nè quattrìnu .
Cun grande pensaméntu intro 'e sinu
muzzère e fizzos senza manigare !!!

Bettat sa lenza in s'iscogliu marinu...
ma non piscat zarrètte nè ambìdda ;
diunu tòtta die ....ite destinu !!...

A s'imbrunire che tòrrada a bidda ;
sos fizzos suos isèttan piscàdu .
Trist'est s'espressione 'e sa pobidda ..!


" Ben fa chi fa ...."

Dae seculos e seculos sa Musa
fidi in s'Isola nostra abbandonada .
Da unu e dae s'àttéru cantada ,
in su modu volgare plus confusa .
In su mattessi istadu fit diffusa
mai dae nessunu controllada .
E medas pro arte o pro mania
creìan de cantare poesia, .

Sardos si no ischide su valore
de su ostru poétticu talentu.„
non mandedas sos versos a su 'éntu
comente faghe su corvu o s'astore ;
ma chircade e bos faghe pius onore
rimediende dae fundamentu
sempre orgogliosos de sa sarda rima
non pius a sa zega che a prima .

Pro dare a sa Sardigna fama e onore ,
pro non la idere in tottu atterrada
tres annos faghe si b'est impegnada
OTIERI cun arte e cun amore
invitende a mannu e a minore
poeta sardu de ogni contrada
de inviare ai cussu sittu
su ch'in versu poetticu had'iscrittu .


Inie b'ada una " Commissione "
ch'isàmina su versu cun talentu ,

cun cura , cun amore e attaccamentu ;
giudica tottu a sa perfezione ;
senz'ischire de chie est sa cantone
daen su votu a su compinimentu .
Su menzu cantu eni pubblicadu
e si curregge chie had'isbagliadu .

Cust'est una guida , un orizzonte
pro custa sarda rima incontrollada ;
est guida pro nois , est istrada :
pro passare su riu est unu ponte .
Necessariu a tottu est chi lu conte
pro esser dae tottu mezzorada ;
custa iniziativa est garanzia
pro sa Sardigna terra e poesia .