Su tempus paret chi no passet mai
in custas mindas pàschidas pro vida.
Sos nuscos, sos fiores e si mai
sas roccas, sas piantas colorida’ .
Inoghe so torradu bell’e gai,
inue de vapore fit bestida.
Sizill’in cussos tratos de puresa,
a m'arribar’in mente sa bellesa.
E deo como chìbberu ch’affundo
sos pès che raighin'in custa terra.
Pro suer chena dol’e cuntierra
sos passos suos pàsidos e mundo
de corpu sas tristuras, perr’a perra...
De trìnnigos e de ardor’aundo...
S’ardore chi su corpus atraessat,
chi de su corpus vivet e no tzessat.
Sa pedde si m’imprimit de istizas,
butios de ‘iddia, de lentore...
O forsis sunt canales de suore,
ch’infustu ant sas tramas cun sas
mizas

De carignosos bisos de amore,
in sònnios o affannosas bizas.
E tanco custos ojos in s'ammentu
de cussu fog’atzesu, fogu tentu.
Mi ninnat s’umidor’in sa chelvija
e su profumu dìligu, fulanu.
M’ischidat punghidore, risulanu,
su timorosu ‘asu ‘e sa pestija.
S’alenu carradore, ruffianu,
bentosu duru-dur’in sas orija’,
m’atuat de sas nues s’isfretzire,
orizos-orizontes de cosire.
Su surdu bamminar’ ‘e su sentidu,
istorchet beffulanu su passadu.
No s’est in custu tempus accansadu,
no s’est in custos annos isvilidu.
Dudosu s’ammadurat, incantadu,
chi fit amore, amor’illimintidu.
Ma no m’arreo de mi pibiare
su chi nos fimus pòtidos donare.