Nuntas de Baccu

Sa giubba fit de milite ‘e s’aèra,
bestida subra mèrmeros de paza.
sutt’uglieras de sole e visiera
de avieri t’ojiat - iscaza
lampizante - sa chìnnida braghera
e cun alentu ch’umpiat meaza
parias lear’ alas dae chelu
e bolare tra bides e filares
a bizare ch’in nottes chena velu
de isteddos ne àlidos de mares,
nemos bodderet ua cun s’anelu
de si nde tìngher càvanos e nares.
Umanu meda prus che buettone
nos ses pàrfidu semper e donz’annu
nos defendias, còntiga o rejone,
costoende a su donnu tou mannu
d’aèr furadu prus de un’udrone
pro chi non s’abizeret de su dannu.
E nois, ninnos cun ojos de bittas,
faghimis torru a binnenn’agabada
a ti lassare lìtteras iscrittas
a punta ‘e leppa subra s’ala lada
de s’istelu, cun ìnnidas rosittas
e corigheddos fertos a ispada.
Pustis, t’intregaimis cun risittos
maccos a sa reina ‘e sos sarmentos
e issa, punta in imbena a giaittos
de gana ardiat chena prus rechentos
de s”ider’ linta in sos giassos prus frittos
cun òsculas e àtteros appentos.
E nois, tott’umpare in notte ‘e pighe
alluttos dae cussu giogu maccu,
cun grigliandas de ua e panarighe,
e-i su mustu ‘uddende in su laccu,
in su cunzadu chintu a calarighe…
tzelebraimis sas nuntas de Baccu.