AMADA TERRA

Ses sempre in coro meu amada terra
mi palpitas in sinu pro ammentare
sos amores de sa irde giuventude
isolana chi a fizu tou has donadu ...
In sa bellesa areste sas doradas
lamas lughen in chelu cando falat
sole mustrende littos de Logudoro
e-i sos nuraghes de antiga esistenzia.
A cara a domo de sa mia nadìa
sos marmaros de funtana "Grixoni"
chi rigettana dae ucas felinas
sas abbas giaras subra inferriadas .
Naturale ricchesa
chi a sos friscos ortos umore dat
cale alimentu de fertilidade
benefica a su poeta
ammentada dae sa leggenda ...
Chìe buffada in sa funtana un'ucconada
podet crobare logu in Elicona ...