BIDDAMEA

Sa torrada
a chircare pessones e cosas
chi esistian galu
solu in sos ammentos meos.
Camino in sas carrelas
che istranza,
chircande sa domedda
in uve so naschia e fatta manna.
Chircande sos amicos de una vorta,
chircande sas cosas de tando.
Est tottu ispariu,
inguglìu dae sa neula 'e su tempus.
Irrobbada m'intendo e traitta
dae custu mudare de sas cosas.
Torrademi sa pizzinnia,
torrademi su primu amore
e sas serenadas a sa luche de sa luna ,
torrademi sa povertade felice
chi mi davat allegria.
Parto torra, pessande chin tristesa
a cantu ses ciambada, bidda mea,
ma vorzis so ego chi so ciambada ,
una preda antica, restada
attaccada a sos ammentos.
M' intendo perdia
e confusa de vronte
a custa realtade
chi no m' appartenit,
chi non resesso a acher mea.
So una preda antica.